ഹ്യുണ്ടായിയോട് വിടപറയാനൊരുങ്ങി സാന്റ എഫ്‌ഇ എസ്.യു.വി?

ഹ്യുണ്ടായി നിരയില്‍ നിന്ന് മുന്‍നിര ഫ്ളാഗ്ഷിപ്പ് എസ്.യു.വി സാന്റ എഫ്‌ഇ വിടവാങ്ങിയേക്കുമെന്ന് റിപ്പോര്‍ട്ട്. നിലവില്‍ കമ്ബനിയുടെ ഔദ്യോഗിക വെബ്സൈറ്റില്‍ നിന്ന് സെവന്‍ സീറ്റര്‍ സാന്റ എഫ്‌ഇ പിന്‍വലിച്ചിട്ടുണ്ട്. നോര്‍ത്ത് ഇന്ത്യയിലെ ചില ഹ്യുണ്ടായി ഡീലര്‍ഷിപ്പുകളും ഇക്കാര്യം സ്ഥിരീകരിച്ചിട്ടുണ്ട്. എന്നാല്‍ നിര്‍മാണം അവസാനിപ്പിക്കുന്നത് സംബന്ധിച്ച ഔദ്യോഗിക സ്ഥിരീകരണം ഹ്യുണ്ടായി ഇന്ത്യ ഇതുവരെ നല്‍കിയിട്ടില്ല.

കഴിഞ്ഞ കുറച്ച്‌ മാസങ്ങളായി ഹ്യുണ്ടായി നിരയില്‍ ഏറ്റവും മോശം വില്‍പ്പനയുള്ള മോഡലാണ് സാന്റ എഫ്‌ഇ. ഇക്കഴിഞ്ഞ ജൂലായില്‍ 14 യൂണിറ്റ് മാത്രമായിരുന്നു വില്‍പ്പന, ഓഗസ്തില്‍ വെറും ഒരു യൂണിറ്റും. എതിരാളികളെല്ലാം ഇക്കാലയളവില്‍ ആയിരത്തിലേറെ യൂണിറ്റുകള്‍ വിറ്റഴിച്ചിട്ടുമുണ്ട്. സാന്റയുടെ അവസാന ആറ് മാസത്തിലെ വില്‍പ്പന നൂറ് പോലും കടന്നിട്ടില്ല, ഫ്ളാഗ്ഷിപ്പ് എസ്.യു.വിയുടെ 67 യൂണിറ്റാണ് ഇക്കാലയളവില്‍ കമ്ബനിക്ക് വിറ്റഴിക്കാന്‍ സാധിച്ചത്.

ടൂ വീല്‍ ഡ്രൈവ്, ടൂ വീല്‍ ഡ്രൈവ് ഓട്ടോമാറ്റിക്, ഫോര്‍ വീല്‍ ഡ്രൈവ് ഓട്ടോമാറ്റിക് എന്നീ വകഭേദങ്ങളിലാണ് സാന്റാ എഫ്‌ഇ ലഭ്യമായിരുന്നത്. 2.2 ലിറ്റര്‍ CRDi ഡീസല്‍ എന്‍ജിന്‍ 194 ബിഎച്ച്‌പി കരുത്തും 421 എന്‍എം ടോര്‍ക്കും നല്‍കിയിരുന്നത്. സാന്റ എഫ്‌ഇ വിടവാങ്ങുന്നതോടെ ഇനി ട്യൂസോണ്‍ എസ്.യു.വിയാകും ഹ്യുണ്ടായി ഇന്ത്യയുടെ ഫ്ളാഗ്ഷിപ്പ് മോഡല്‍.